Etxabez etxabe drogen gaineko informazio emateko

Hegoak Elkartetik adierazten dutenez, hamaika urte dira proiektua hasi zutenetik. «Espazio pribatu hauetan, gazteek euren arauak ezartzen dituzte, autonomiaz funtzionatu ahal izateko moduak, lagun artean egoten dira kanpokoen kontrolatik at», gogoratzen dute. «Hortaz, elkarrekin egotea eta ezagutzea, dibertitzea, jolastea, antolatzea, materialak gorde, ikastea, eta abar luze bat eskaintzen dute bajerek». Izan ere, «bajera azken batean, Nafarroan eta beste zenbait herrialdeetan gazteentzako aisialdian dagoen hutsunearekiko erantzuna da».

Horregatik eta udaren bueltan, hilabete honetatik aurrera abian jarriko dute Hegoak Elkartetik bajeren proiektu hau. «Gazteek drogen inguruan informazio objektiboa eskuratzea ezin bestekoa da arriskuak murrizteko estrategiak lantzeko eta bajerak tokirik aproposenak dira horretarako», uste dute Hegoak Elkartetik. Beraien iritziz, «drogen fenomenoaren inguruan askatasun handiagoz hitz egin dezakegu, iritziak eman, eztabaidatu, zalantzak argitu, eta abar». Argitzen dutenez, Iruñerriko eta zehazki Barañaingo zenbait bajera bisitatuko dituzte Hegoak Elkarteko kideek, «beti ere, informazio objektiboa eskainiz eta bakoitzaren iritziak errespetatuz».